قصيدة لأهل بلدي شفاعمرو

يا خَلوتنا ويا جامع الهادي                            ويا أم الكل يا كنيسة الفادي

دَخلو الّلي فَرَض عَلينا إطاعة                        تََوصّلنا على بيوت العبادي

عَ خَلوتنا اللي ما بِتحب الخَلاعة                     الشّيخ بْيعزْمَك تاتكون هادي

وعَ الكنيسة اللي عِطيتنا الشّفاعة                    الخوري منعزمو وَقت العمادي

وجامعنا اللي مبني عالّشّجاعة                        بْيعزُم عالصّلا رْجال المَبادي

لمّا الفَجر يوعى من الوَداعة                              بقلّو للمأذن قوم نادي

عَ أهل بَلدنا الفي عندُن قََناعة                         بالتّعايُش والّتسامُح والإرادي

توحّد قْلوبنا وتزيد البَراعة                                بِتوحيد الطّوائف عا زيادي

ونصون بَعضنا من كُل باعة                            ونِتعاون عَتكثيف الأيادي

ونحمي هالبلد من كل إشاعة                            ونِتحكم بعقليتنا يا هادي

ويا شباب بلدنا انتو الإذاعة                               بِنَشِر أخبار السّعادي

ضحُّوا بِمَحبتكن في كُل ساعة                          واتعلّموا من رِجال القيادي

وأنا شاعر شَبع روحي مَجاعة                         حياتي شِعر لأهل البلادي

بِسهَر تا يْدوخ حَرف الطّباعة                     وْتوعى الشمس في كُل يوم عادي

شو قيمة شب ما عِندو مَناعة                           بَلا مْواعيد مع أهل السّيادي

بيروح يدُق عآلناس بْجراعة                      مثلِ الحامِل جْراب الشحادي

هذا شو بْقلّوا يا جَماعة                            اُعذروني لو كُنت مِش اعتيادي

بقلّوا اتركني تا نام ساعة                           وإذا ما نِمت يا خيّ ما بِسهر

وإذا ما سْهِرت ما بْعيّش أولادي

شعر: تيسير شفيق قائدبيه - شفاعمرو