بعض البشر ألسنتهم كالافاعي
بقلم : ميلينا زاهر كلداوي-حيفا
صباح الخير...
فكرت كتير قبل ما أكتب يلي بدي أكتبه أو أحكيه...
ولكن يللي بسكت على الغلط بكون شارك فيه...
والصراحة خلص فاض الكيييل وما عاد الشي ينطاق...
من أسبوع ترووج أفلام عن زوجين أثناء مجامعتهما والشي طبيعي بين أي زوجين.... ويا محلاه لما الجمل بقع وبتكتر سكاكينه... مش مهم كيف تسربت اﻷفلام ومين الحيوان ابن الحيوان يلي بلا ضمير عملها وشو كان هدفه ساعة ما عملها يلي إن شالله فلم ﻹمه وأخته ومرته وبنته يتسربه مع أني ما برضاها لحدا وما بحب لحدا هيك فضايح ولكن اﻷسوء من ابن هالحرام إحنا اه إحنا... مجتمع كامل ومتكاااامل نساء ورجال شباب وصبايا تركنا أشغالنا وأعمالنا ومشاكلنا لكبيرة ولصغيرة وتمركزت حواسنا وإهتماماتنا بأنه نشوف الأفلام يلي ما شاء الله سرعة انتشارها سبق سرعة الصوت وسرعة الضوء... ما وقفت عهون بعد ما انعرف أنه الفلم لزوج وزوجته طلع الموضوع بايخ لازم نعمله حركة وأكشن فمنفبرك قصص...
عشيقها سرب الفلم.... صديقتها الغيرانه سربت الفلم... هي سربت الفلم لتقهر ناس... التقني من شركة التلفونات سرب الفلم... الحرامي يلي سرق التلفون سرب الفلم... وقصص وقصص وقصص...
ما خلصنا دور السيناريو التاني... الزوج حاول اﻹنتحار ... والزوج ظبطت معه بعد المحاولة وانتحر ومات شي 5 أو 6 مرات.. ما هو فلم هندي... بعدين اﻹبن انتحر... سلامة قلبه من حكي العالم...
ما خلصنا... فتنا بالنكت المكتوبة وما ضلت عهووووون... مبارح بالليل بوصلني تأليف أغنية كلمات يلي دارت بالفلم وملحنه وعازف جيتار وتعبانين عليها بنفع يشاركوا بذي فويس... فما عدت أتحمل السكوت والله صابني وجع راس فوق وجعي...
ولكوا يا عالم يااااا ناس يلي مفكرين حالكوا محترمين إحنا شعب واطي سافل منحط وقليل أدب وترباي منتغنى ومنعيش ومنفرح عقصص ومصايب العالم ... ولكوا أي زوجين طبيعيين ما بمارسوا الجنس مع بعض وانت يا شاب وانت يا صبية كيف إجيتوا عالعالم لتكنش إمك وإمها حل عليها الروح القدس مثلا تخلفت هاي التخلفة العاطلة التلفاني.... ولكوا عيب عليكوا وحرام عليكوا... ما حدا فكر بالتصرف يلي عم تعملوه شو رد فعله بهدا البيت ولكوا يلي رووج الفلم قضى عليهن مرة وكل واحد فينا عم بقضي عليهن مليون مرة...هدول زوجين حرين كيف يمارسوا أقدس علاقة حللها الله وشرعه وكل واحد فيكوا عندهخياله وفنتازيته الخاصة فيه ما بفكر في واحد منكوا لما بقوم بممارسة الجنس بحط كاتم صوت وما بتلفظ بكلمات ما بعرف شو هي... كل انسان حر وما بتعملوا أكتر من هيك يا ملايكة... وعدا عن هيك تركتوا كل اﻹنحلال يلي بالمجتمع وكل الخيانات واﻹنحرافات يلي عأنواعها بحياتنا هداك ما بتشفوه ولا بتحكوا فيه أو عنه عيونكوا ما بتشوف إﻻ يلي بدكوا تشوفوه وما بتسمع إلا يلي بدكوا تسمعوه وتحكوا يلي بدكوا تحكوه... طب وآخرتها وينتا بدنا نخلص من هالقصة... أكيد عم تستنوا قصة جديدة وفضيحة جديدة تلتهوا فيها...ريت كل واحد يلتهي بحاله بس... والله العظيم عيب عيب عيب وحرام يلي عم ينعمل وقرف كمان...
بتمنى وبطلب من كل واحد فينا يحط حاله مكانهن يمكن هدا الشي يصير معك أو معه... كل شاب وصبيه يحطوا حالهن محل اﻷولاد ومحل أهلهن وما تحطموهن أكتر من هيك بكفي وحياة الله بكفي صدقوني هالشي بحرق القلب وخراب البيوت ودمارها مش هوين..
وأنا كأم وكزوجة وكفرد من هالمجتمع بدعم هاي العيلة وباﻷخص هاي الزوجة معنويا مع العلم اني ما بعرفها شخصيا وما التقيت فيها بحياتي وبطلب منها تطلع من بيتها وتحط أصبعها بعين أكبر زلمة ومرأة وتكمل حياتها بكل ثقة هي وزوجها ووﻻدها...
ويا سيدة اعرفي شي واحد انتوا ما ارتكبتوا خطيئة ولا عملتوا جريمة.. ولكن المجتمع كله ارتكب خطيئة وجريمة أكبر بحقكم... وبعتذر...
واعتبري هالمجتمع طبيب نسوان وانكشفتي عليه..
وانتوا يا مجتمع يا مربي اﻷجيال الصاعدة كل واحد يحكم ضميره شوي مش كتير ويا ريت لما بدكوا تنشروا شي انشروا شي يفيد البشر ويتعلم منه ويستفيد...
ومع كل كلامي القاسي الجارح يلي حكيته لفئة معينه ما بسعني غير أزيد خلوا صباحنا طاهر وقلوبنا وسلوكنا أنظف من هيك...
صباحكم سكر♡♡♡♡♡♡♡
